[太阳拆局]西杯攻略皇马睇定食半和发维

今晚西杯16强上演「西甲内讧」，皇家马德里作客硬撼维拉利尔。「银河舰队」啱啱失落西超杯，力疲心伤，嚟紧赛程超级频密，随时勒住踢睇定嚟食；维拉利尔向来硬净，加上两军近年对赛初段常演闷战，半场和有计。
（周五凌晨4时开赛）

皇马季初顺风顺水，查实有啲运气，嚟到世杯后复赛，比赛过多导致体能不足问题逐渐浮现。佢哋上周远赴沙特踢西超杯，4强仅凭互射12码淘汰华伦西亚，决赛对住巴塞全场捱打，最终输1比3，中场冇咗受伤嘅曹亚文尼，卡马云加拍住两老莫迪历同却奥斯，无论截击力及速率都严重下降。「银河舰队」复赛后5仗仅入6球，其中3球嚟自12码，火力平平。不过主帅安察洛堤冇时间「哭波丧」，事关2月又要出战世冠杯，赛程咁频密一定要识留放，有需要时刻意拖慢节奏，睇准先出击，等众将回回气。

维拉利尔主场交锋唔输蚀
维拉利尔踢法向来硬净，近7仗正式赛事保持不败，查实佢哋近6次主场对皇马，取得1胜5和未输过，包括本月联赛主场赢2比1，唔讲得笑，咁快又喺地头交锋，「黄潜」心理上已经占优。翻查纪录两军近3次碰头半场都系0比0，今仗再开唔奇。